Two Abroad

Navigation

Zšlte, Ottawa & Montreal

So also, euse Canada & USA Trip hed am 12. Juli gstarted.

Mer send met eusem supercoole Ford Fusion öbbe am 1 bide Rose (Caledonia) losgfahre. Nacheme Stopp binere Bank eschs denn Rechtig Toronto gange...dor Toronto dore emmer Rechtig Nord-Oste zom Emily Provincial Park ide Nöchi vo Omemee.
Det semmer öbbe 3.5h spöter guet acho, händ eus agmäldet ond send schliesslich of eusem Zeltplätzli mitere Füürstell ond Steckdose acho. Well mer kein Tisch gha händ, semmer eine bime leere Platz go chlaue...det heds zwoi gha
Nachher hämmer afo euses Zelt ufstelle, was nach einige Alaufschwierigkeite ganz guet gange esch
Nach dere schwere Arbet hämmer eus iigrichted, s Znacht parat gmacht (Sandwiches, Müesli met Milch, Öpfel ond Timbits) ond eus zwöschedore emmr weder met Antiinsektespray iignäblet Denn semmer nochli a eusem Tisch ghocked, händ Tagebuech gschrebe ond send denn gli go schlofe.

Am nechste Tag semmer relativ früeh verwached, wels halt scho ned ganz so bequem esch wie ime rechtige Bett.
Zom Zmorge heds Müesli ond Öpfel geh...gmischt met echli Räge :-S Fasch chli panisch hämmer welle s Zelt zämeruume, bevors rechtig afohr rägne, aber s esch denn halt scho nass gsi Hämmers halt lo sii ond gwartet, beses ufhört rägele. S esch denn au gli so wiit gsi ond de hämmrs ganz schnell putzt ond zämegruumed. Es hed denn nächär nomol afo rägne, aber dasch eus denn glich gsi, mer send de nämli scho gange

D Fahrt esch wiiter gange, bes mer noime en Starbucks gfonde händ. Det hämmer en Pause gmacht, euse PC uspackt ond es Hotel för Ottawa gsuecht. Well mer chli spot gsi send, hämmer eus schliesslich förs Jail Hostel entschiede.
Denn eschs wiitergange...öber de Highway 7 Rechtig Ottawa. Wie emmer semmer denn in Ottawa nochli im Stau gstande ond send öbbe 3x oms Hotel omegfahre, bes mer de Parkplatz gfonde händ.
Mer händ euses Zimmer (6er Zelle) bezoge ond ghofft, dass sosch niemer meh chont ond mer s Zimmer för eus elei händ Esch denn aber doch ned so gsi ond es send no zwoi anderi cho.
Mer send denn nochli use, send chli omegloffe ond denn im The Grand go Znacht ässe. Aschlüssend semmer nochli im Städtli omegloffe ond denn zrogg is Hotel ond det nochli an PC
D Nacht esch zemli müehsam gsi, wells sonen mega luuti Air Condition gha hed, wo för 20 sek. gloffe esch, denn abgstellt hed ond nach 20 sek. weder agloh hed...zemli müehsam. Drom hämmer au ned so vell gschlofe i dere Nacht.

Am 14.7 hämmer im Garte vom Hotel eusi restliche Sandwichs gässe ond send denn zerst ines Shopping Center ond nachher weder go d Stadt aluege. Send an Fluss abe, zom Parliament Hill ond sosch no zo paar spezielle Gebäude
Öbbe am halbi 5i semmer zrogg zom Hotel, händ eus chli erholt ond send denn am 7ni ofd Jail Tour. Esch interessant gsi, z erfahre, wies früehner i dem Gfängnis gsi esch.
Nachher semmer weder id Stadt go Znacht ässe. Inzwösche send nomol 2 Mädels i euses Zimmer zoge ond vo dene hämmer denn erfahre, dass am Obe ofem Parliament Hill en Liechtshow esch. Aso semmer of di halbi 10ni det hi ond händ d Show gluegt. Met Schiinwerfer eschs Parliament belüchtet worde wie en Liinwand. Sehr schön gsi
Nachher weder zrogg ond schnell is Bett. Leider esch au die Nacht ned so de Hammer gsi, 1. wäg de Klimaalag ond 2. well ich Zahnschmerze becho han... Drom weder di ganz Nacht praktisch wach gläge ond fasch doredreiht...
Be de froh gsi, wo morge gsi esch.
Mer send schnell ufgstande, händ euses Zügs packt ond send denn am 10ni scho dosse gsi. Im Navi Montreal iigeh ond denn eschs wiiter gange.

Ofem Weg uf Montreal hämmer binere Apothek Halt gmacht, well ich es Schmerzmittel han welle chaufe för min Zah. D Frau hed mer denn aber empfohle, zome Dentist z goh ond nachdem si 3 Phone calls gmacht hed, hed si mer schliesslich eini gfonde ond denn semmer halt zom Zahnarzt gfahre
I be grad dracho ond nacheme X-ray hani denn erfahre, dass mis Zähnli am sterbe esch ond i han denn Antibiotika becho ond Schmerzmittel.
Denn hämmer (öbbe am 12i) fang öbis chlises gässe ond denn eschs (ohni grossi Schmerze, dank em Medikament) wiiter gange alles grad uuus, alles grad uuus Rechtig Montreal

In Montreal semmer so am halbi 4i acho i eusem Hotel (Montreal Central). Mer händ iichecked, euses Zimmer bezoge (es eignigs Bad, wie schöööön) ond send denn use, ines Restaurant öbis chlises go ässe. Denn semmer nochli dor d Strosse gloffe, irgendwenn weder zrogg cho ond händ denn do im Hotel es gratis Znacht becho: Käsesspätzle met Salat
Denn zrogg is Zimmer ond gli go schlofe.

Jetzt semmer weder i eusem Zimmer ond hänges nochli. Vori hämmer Zmorge gha do im Hotel (Gifpeli, Waffle, Muffins, Toast, Eier, Maple Sirup, Orangersaft...) Super gsi.
Etz gömmer denn id Stadt mol chli go omeluege, wases do so het We´ll see

Bes am 18. Juli bliibe mer etz do, denn gohts wiiter. Wo genau mer de nechst Halt mache, wösse mer noni

Write soon again Take care.
Luv Katja

Katja am 16.7.11 16:31


The first days

So, denn schriibe mer doch do au mol, ned dases no usgseht, als wäre mer verscholle ;-)
Mer händ eifach scho so vell erläbt ond händ vell z due, dass mer gar no nie dezue cho send, do z schriibe. Osserdem esch s Internet do im Chruut osse au ned emmer ganz so de Hit ... ;-)
Aber fömmer vore ah:

28.6.2011
Eusi Reis hed scho ofem Wäg zom Flughafe guet agfange...Stau Stau Stau. Zom Glöck hämmers denn aber doch no pünktlich gschafft. Nachdem mer bim Check-In schön brav alli Froge beantwortet händ (Wo händ si packt? Wo esch ihres Gepäck bes jetzt gsi? Wer hed packt? und und und) ond au dor d Passkontrolle cho send, hed de erst Stress scho agfange. Mer händ müesse s Zügli neh zo eusem Gate...Ich ben scho dinne gsi wo d Türe zuegange esch...d Aline ned XD Ja egal, mer händ eus denn bim Gate weder gfonde ond händ au gli chöne istige.
De Flug of New York esch guet ond au relativ schnell gange. In NYC hed denn aber de Stress agfange. 1h astoh förd Passkontrolle esch eifach z lang, wenn mer nor 2h Ziit hed, zom de Flüger wächsle. Das hed eus denn au de Typ gseit, woner eusi Päss kontrolliert hed: Ich: "Do we have to run...?" Er: "Yes, you have to run very fast." Ah danke, nice to know ;-)
Ond so semmer denn halt zäme met je zwoi Köffer plus Handtäsche dor de Flughafe vo NYC gsprintet. Zom Glöck esch jo au alles so guet agschrebe gsi, dass mer nie falsch grennt esch... *ironie*
Irgendnoime heds denn en Platz gha för settig, wo en Aschlussflug händ. Mer händs aso det hiigstellt ond send wiiter grennt wie blöd immer mitem Gedanke "Was mache mer, wenn die ohni eus abflüge?"
Schön esch denn au no, wennd scho wörkli nöm magsch, denn aber anen riiise lange Gang met de Gates chonsch ond d Nummere vode Gates aluegsch "48, 46, 44, 42, ...." Mer händ s Gate 32 brucht. Das hed mer ned mol meh gseh, so wiit hinde esches gsi.
Aber guet, mer händ au das gschafft ond send schliesslich schweissnass ond todkaputt im Flüger nach Toronto gsässe.

In Toronto semmer guet glandet..aber immer chli metem Gedanke, dasses förd Köffer ned glanged hed ond die no in NY send...die Vermuetig hed sech denn au bestätigt womer as Gepäckband cho send, nachdem mer zerst no ide Immigration händ dörfe Red & Antwort stoh ;-)
S Band esch aso leer gsi, mer händ eus aber scho chönne währendem Flug druf vorbereite, drom esches ned so schlimm gsi ;-)
Aso ab zonere nätte Frau go Formular usfölle ond schliesslich ca. 1h nachdem mer glandet send, hämmer denn ändli use chönne ond send vode Rose, em Ruedi ond de Anna abgholt worde.

Mer send denn met de Rose hei, händ euses Zimmer bezoge, Znacht gässe ond händs, obwohl mer toooodmüed gsi send, immerhin bes öbbe am 9ni usghalte. Denn semmer aber eifach is Bett gläge ond händ gschlofe

29.6.2011
Nachdem mer Zmorge gässe händ, hämmer druf gwartet, dass eusi Köffer de Wäg au no finde. Schliesslich esch denn tatsächlich en liebe Maa häregfahre ond hed eus eusi heissgeliebte Köffer brocht. Daaanke
Nachher semmer met de Rose oms Feld spaziert ond händ en gmüetliche Tag gha. Am Obe semmer uf Caledonia ines Thai-Restaurant go Znacht ässe ond nachher au weder einisch is Bett go d Ziitverschiebig uskuriere.

30.6.2011
Mer send relativ früeh ufgstande zom de Tag in Toronto z verbringe.
Det semmer zerst an St Lawrence Market go Crepes zom Zmorge ässe. Nachher semmer echli dord Stadt gloffe, händ dies ond jenes agluegt ond send schliesslich an Hafe cho. Det hämmer en Schiffstour zode Toronto Islands gmacht (1h). Esch super gsi, metere geniale Sicht ofd Stadt ond de CN Tower
Denn semmer zrogg zo eusem Auto (met de Cablecars xD ) ond send denne echli wiiter gfahre, id Nöchi vom Manulife-Center. Det semmer go s Royal Ontario Museum aluege (nor vo osse), das esch es mega speziells Gebäude
Mer send au i paar Läde ine, aber die send emmer tüürer worde (Prada, Gucci usw.) drom esches ned so lostig gsi ;-)
Aschlüssend semmer denn ofs Manulife-Center, ufein 51. Stock is Restaurant Panorama. Det hämmer d Ussicht gnosse ond öbis chlises gässe.
Aschlüssend semmer no schnell go paar Sache chaufe (Batterie...ond Ballerinas xD ) bevor mer denn weder zom Auto send. Ofem Heiwäg semmer ines Restaurant am Strand vom Lake Ontario ond händ Znacht gässe (Shrimp Pasta ).
Denn semmer zrogg hei, send nochli dosse ghocked ond denn go schlofe.

1.7.2011
Canada Day Mer händ schön usgschlofe (d.h. bes öbbe am 8i, länger gohts noni), send use go sönnele, Tagebuech schriibe ond go bade. Zwöschedore hämmer es Türli met de Quads gmacht xD
Am Obe send denn de Ruedi & d Anna cho met de Riley. Mer händ zäme Znacht gässe ond send denn uf Caledonia zom s Fürwerch go luege.
Denn weder hei ond ab is Bett.

2.7.2011
Höt semmer am Morge weder zemli früeh ufgstande...etz wos ändli klapped hätt met länger schlofe ;-)
Aber egal, mer send zo "Cora´s" go Zmorge ässe - eifach suuuper gsi Nachher semmer wiiter gfahre nach Port Ryeres (oder so ähnlich) am Lake Erie. Det hämmer en chline Stop gmacht, öbis trunke ond denn semmer weder wiiter nach Port Dover. Det semmer chli de Shops nochegloffe ond nachher im Strandrestaurand öbis Znacht go ässe.
Denn semmer weder hei gfahre. Znacht hämmer nüt meh möge, die Portione do send eifach z gross för eus ;-)
Ond jetzt setze mer do i eusem Zimmer ond hängeds do hinder de PC´s.
Wie gseit, s Internet esch chli komisch, of mim PC gohts gar ned, ofem Natel aber meistens scho ond bide Aline ihrem PC au... Don´t know why ;-)

3.7.2011
Mer send go shoppe That's all xD

Aso, das wär mol so en Chorzfassig gsi vo eusne erste Täg.
Mer hoffe, euch gohts allne guet ond jo..macheds guet ;-)

Luv
Katja

Katja am 4.7.11 01:50


Wellkomme...

...of em Reiseblog vode Aline & de Katja.

Well mer zwoi vom 28. Juni här 5 Woche z Kanada ond ide USA send, hämmer eus de chli Blog iigrechtet, zom eusi Erläbnis ond Idröck vo eusere Reis met euch z teile.

Mer probiered, so hüfig wies goht es Läbeszeiche vo eus online z stelle. Aso lueged doch do ab ond zue verbii, wener wänd wösse wies eus grad so goht ond was mer grad mache.

Bi "Tour" hämmer chorz eusi Auto-Tour beschriebe ond ehr fendet det au en Charte dezue.

Bi "Pics" stelle mer denn ame eusi Links zode Bilder ine. Mer hoffed, mer händ ab ond zue Ziit, zom di neuste Bilder is Facebook z lade ond denne de Link au do z poste, damit au "Nicht-Facebookler" eusi Föteli chöned go aluege.

De Blog chönder notürli au (irgendwie) abonniere. Eifach of "RSS" klicke ond denn setts ergendwie go, dass ehr informiert wärde, wenn mer do öbis schriibe

So, denn hoffe mer mol, dass ehr interessiert a eusere Reis teilnähmed. Mer wörded eus notürli au öber Läbeszeiche vo euch sehr freue, sigs per Mail oder do im Blog. SMS send velech ned so gschiid, weil teuer  Skype esch aber (amel bi mer!) scho installiert ond wenn mer noime WLAN händ, wär das secher au no möglich

Also, demfall vell Spass ond hoffe, mer liest oder schribt sech!

Grüsschen

Katja

Katja am 26.6.11 16:26


Gratis bloggen bei
myblog.de